Feature Tempat Wisata: Sumur Jalatunda, Papan Wisata ingkang Gadhah Kathah Cariyos

Dieng, Kabupaten Banjarnegara pancen salah satunggaling papan ing Indonesia ingkang mboten nate sepi dipuntuju dening para wisatawan. Wisatawan-wisatawan kathah ingkang remen tindak dhateng Candi Arjuna, Kawah Sikidang, Kawah Sileri, Tlaga Werna, lan sapanunggalipun. Taksih kathah papan ingkang gadhah nilai sejarah lan budaya ingkang dereng kathah dipuntepangi dening para wisatawan, tuladhanipun Sumur Jalatunda. Kathah cariyos bab sejarah Sumur Jalatunda ingkang wonten ing masarakat Dieng. Papan menika ugi kathah nilaraken kapitadosan ingkang asipat ghaib.

Gambar dipunpundhut saking http://www.indonesia.travel/id/destination/858/sumur-jalatunda-sumur-tua-raksasa-di-dataran-tinggi-dieng

Nami Sumur Jalatunda dipunpendhet saking cariyos wayang Mahabarata ingkang dipunginakaken kangge nggabungaken dunya saha bumi lapis kaping pitu utawi Sapta Pratala. Wonten ugi ingkang nyebutaken menawi Jalatunda menika saking tembung Jala saha Tunda ingkang tegesipun menawi gadhah pengangen-angen kedahipun mboten dipuntunda-tunda malih. Sumur Jalatunda ugi asring dipunsebut Sumur Raseksa amargi sumur menika ageng sanget. Wonten kalih versi cariyos kados pundi sumur menika wonten. Cariyos menika wonten ingkang asipat ilmiah saha mistik. Menawi miturut pamikiran ilmiah, sumur menika kabentuk amargi erupsi Gunung Purba ingkang ngawontenaken rong ingkang ageng lan kaisi toya jawah saha toya saking sumber toya.

Menawi kapitadosan masarakat ingkang asipat mistik, ing jaman rumiyin wonten putrid ingkang ayu rupinipun. Putrid menika nyuwun tumbal tiyang ingkang badhe dipunpejahi kanthi dicemplungaken ing Sumur Jalatunda. Cariyos sanesipun bab sumur menika ugi ngrembaka ing masarakat. Wonten kapitadosan bilih wonten ing sajroning sumur menika wonten lawang ingkang tumuju ing papanipun ula setengah dewa. Wonten ugi cariyos ingkang ngandharaken menawi Sumur Jalatunda kabentuk saking tepak samparanipun tokoh wayang ingkang asma Bima ingkang nepakaken samparanipun nalika lagi murka.

Kangge tindak dhateng sumur menika, kita kedah nglampahi 257 undhak-undhakan. Sakduginipun ing Sumur Jalatunda, kathah tiyang ingkang mbalang watu ing sumur menika. Wonten cariyos bilih sintena kemawon ingkang saged mbalang watu ingkang tebihipun nglampahi agenging Sumur Jalatunda mila menapa kekarepanipun saged kadumugen. Cariyos sanes ugi ngandharaken kapitadosan menawi nglampahi undhak-undhakan kangge tindak dhateng Sumur Jalatunda bakal beda cacahipun antawisipun cacah andha nalika minggah lan nalika medhak.

Inggilipun Sumur Jalatunda menika 2000 meter saking wates toya seganten (dpl). Pramila kahanan wonten ing Sumur Jalatunda menika atis sanget. Wonten ing sakiwa tengening papan wisata menika kathah panginepan arupi wisma, hotel, lan sapanunggalipun. Kathah ugi sarana wisata ingkang dipunsediyakaken kadosta rental mobil, tourguide, lan sapanunggalipun. Kangge tindak dhateng Sumur Jalatunda, kita mbetahaken wekdal 45 menit saking Wonosobo mawi kendharaan . Sumur Jalatunda menika awujud sumur ingkang ageng sanget lan ketingal sampun sepuh sanget. Sepuhing sumur menika saged ketingal saking tetuwuhan ingkang kathah tuwuh ing pinggiring sumur.

Mboten namung pemandangan lan carityos mistik ingkang narik kawigatosan para wisatawan kangge tindak mrika. Wonten ing ngrika kathah ingkang sadeyan unjukan lan dhaharan khas Dieng. Tuladhanipun manisan karika, wedang purwaceng, kenthang asli saking Dieng ingkang dipungoreng. Unjukan saha dhaharan menika wau namung saged dipunpanggihaken wonten ing Dieng. Menika wau ugi ndadosaken kathah para wisatawan ingkang remen tindak dhateng ngriku.